ازيكم ياأحلي فتوكات كريستالات قمرات شطورات
بعد ما ذكرنا بعض الطرق عن حفظ الفواكه والخضروات ودي من واقع تجاربي وخبراتى المتواضعة في مجال شطارة ستات البيوت وطبعا فيه منكم كتير عمالقة بس ادينا بنتعلم
والحمد لله ان الاجزاء السابقة عجبتكم وكمان جالي افكار جديدة ومقترحات بس لسه مجربتهاش بصراحة من عضوات مشكورات عن حفظ الموز مثلافي الفريزر وكمان القرنبيط والفلفل الاخضر كمان نسيت طريقة في حفظ الخضروات وهى التجفيف ودى طرق من جداتنا طبعا مكنش عندهم تلاجات بس كانوا شطورات طبعا زى تجفيف الملوخية والبامية والبسلة وهكذاوبتبقي موجودة طول السنة كمان
النهارده بقي هنكمل مع شوية حاجات لذيذة كده بعضها يعتبر اساسي معانا طول السنةودائم الاستخدام والبعض الاخر موسمى او مرتبط بمناسبات معينة وبرضو هاذكر ده من واقع يومياتى وظروف حياتى وهقلكم ازاى بس تابعونى ومتزهقوش منى
نبدأ نتكلم عن مأكولات معانا طووووول السنة بس نواشف ولانها نواشف برضو بتبقي معرضة للتلف او انها تسوس اوتفسد بسبب سوء التخزين حتى لو الكمية اللي عندنا قليلة فلازم نهتم بتخزينها
البقوليات
اللي هى ثمار صغيرة جافة ذات فلقتين زى العدس والفول واللوبيا والفاصوليا ......وتعتبر البقوليات من اغنى مصادر البروتينات وتفوق البروتين الحيوانى واصح منه كمان في الاكل






الحبوب
وهى ثمار ذات فلقة واحدة زى الارز والذرة والقمح ...........


لانى كنت عايشة في مصر فترة مع ولادى لسفر الزوج كنت باشتري حاجاتى كلها مرة واحدة عشان مش كل شوية انزل اشتري او وولادى في المدرسة اجى اطبخ الاقي حاجة ناقصة
لازم اول حاجة ومن اساسيات التخزين يبقي المكان مش رطب وبعيد عن مصادر الماء ويكون كمان في اوعية عازلة عشان الرطوبة بتكون اول خطوات العطب او الفساد
انا اول مااشتري مثلا عدس علطول في برطمان كبير وعليه شوية ملح صغيرين واخض البرطمان عشان الملح يدخل في كل العدس كذلك بقية البقول والحبوب بس طبعا فيه حاجات مش باستخدمها كتير زى اللوبيا مثلا باحفظها في التلاجة وعليها ملح برضو
وكذلك لو الارز رخيص وجبت شكارة او شوال او اى تسمية يعنى باجيب برضو ملح واقلبه فيه قدر المستطاع وما اسيبوش علي الارض مباشرة ارفع الشكارة دى علي كرسي صغير من بتوع المطبخ فاكرنهم اللي كانوا خشب دول حماتى ادتنى واحد ربنا يخليها
المهم يبقي فيه عازل بين الارض وبينه
القمح طبعا بيتعمل بيه بليله او عاشورا وطبعا بيتنقي ويتغسل ويتنقع ليلة ويتسلق انا باسلق الكمية كلها لانه بيسوس بسرعة وباحفظه في الفريزر في علبة ويوم ماجى اعمل بليلة اطلع العلبة من العصر علي رف التلاجة علي بالليل كده بيفك شوية باخد الجزء اللي فك ولو محتاجة زيادة باضغط بالمعلقة بيطلعلي شوية وارجع الجزء المجمد وممكن تحفظيه في علب صغيرة حسب مقدار اكلتك بس انا معنديش مكان كبير في الفريزر
ونفس الطريقة للحمص وقالتلي عليه حبيبتى العضوة عسل ابيض وحلاوته زياده مشكورة قالتلي علي طريقة حفظ الحمص وبتستخدمه في طواجن واستخدامات اخري وانا باستخدمه طبعا زى الترمس يتسلق ويتملح وممكن اعمل بيه سلاطة طحينة بالحمص بيبقي تحفة وممكن يتسلق ويتعمل زى اللوبيا بصلصة برضو كويس بس تقيل شوية
كمان اللي بيبوظ بسرعة الفول المدشوش برضو باستغله بسرعة في بصارة او عجينة طعمية وعالفريزر انا عندى علبة بصارة جاهزة في الفريزر اهى يادوب تفك شوية واقلبها عالنار الهادية مع مية بسيط واعمل التقلية علي فكرة ماما علمتهالي بثوم مش بصل زى تقلية الملوخية كده ومعاها سمسم

بس دى مش بصارتى وادي الطعمية كمان
وشوربة العدس كمان باحفظ الباقي منها في اكياس في الفريزر
يبقي الطريقة المثلي لما سبق هى الملح وده لان لو حاجة سوست في الدولاب كل الباقي بيتعدى ويبوظ طب ليه
كمان انا بحب اوى البرطمانات الزجاجية افضل من العلب البلاستيك او انى اسيب اللي اشتريته في الاكياس زى ماهو
كذلك الدقيق باحطه في علبة بلاستيك مش مشكلة ولو كمية برضو عالتلاجة
كذلك السمن لان النمل اللي ساعات بيهاجم مطبخى في الصيف مزاجه يستقر في علبة السمن معرفش ليه مدمن دهون وعاوز يربرب
الزبدة ملهاش مكان غير التلاجة لو فضلت بره فترة زيادة تتعرض للعفن
كذلك طبعا البيض والجبن كلها خصوصا لو فتحنا العبوات بتاعتها
وبالنسبة للجبنة اللي بتنشف من التلاجة انا باطلع حتة مش كبيرة يعنى اول باول عشان متنشفش كمان اما باشتريها لازم احطها في علبة بلاستيك وعليها شوية شرشة من البقال وهو بيديهالي واحطها فيها عشان متنشفش
التوابل

لاغنى عنها في اي بيت بسسسسسسسسسسسسسس بلاش نشتريها بكميات لعدة اسباب
اولها عشان لما تكون جديدة بتبقي نكهتها واضحة ومميزة
وكمان عشان مترطبش عندى وتفقد ريحتها وطعمها
والاخطر انها ممكن تضر مش تنفع لو قعدت زيادة وطبعا اى حاجة مطحونة طازة افضل بكتير وانا للاسف باشتريها مطحونة وعلي عينى لان معنديش مطحنة علي الرغم من انى عندى كيتشن ماشين بس مع كل اجزاؤه دى مفيش مطحنة اللي معاه وافتكرتها مطحنة طلعت كبة صغيرة
وانا بحب اوى التوابل وباحب اجرب الجديد منها وبتزيد الانواع عندى ولله الحمد
ولو هتشتري كمية يبقي اشتريها مش مطحونة واطحنى انت مثلا كل اسبوع قدر استهلاكك والباقي احفظيه في برطمانات نظيفة
وعششششششششانى بقيت اسافر فبقيت اجيب بن بكمية شوية وباحفظه في التلاجة برضو
التسالي
اللب والفول السودانى والمكسرات بتاعت رمضان اللهم بلغنا اياه

لما باجى اسافر باشتري لب سوبر ولب سوري اللي هو لب تباع او دوار الشمس وفول وغيره وغيره عشان مفيش بره زى حاجات مصر علي فكرة
المهم البياع اللي في المحمصة قبل مايعبي الحاجات دى في اكياس ورق بيحطها في كيس بلاستيك الاول وبعد ما بسافر باشيله بالكيس بتاعه وعلي برطمان زجاج محكمممممممم الاغلاق جدا ولو انت جايبة شوية صغيرين مثلا علطول علي برطمان عشان ما يطراش منك وخصوصا ايام العيد او المصايف او كده ولو لقيت الفول السودانى طري منى بادخله الفرن في صينين او من فوق عالشعلة اقلبه تقلبتين واسيبه يهدى
وكانوا زمااااان وما أحلي ايام زمان بيتفننوا في تجفيف وتمليح لب البطيخ والشمام وده تسليتنا عالبحر قبل ما تطلع عربيات الفشار هههههههههه
كمان لو خارجين من رمضان وفيه شوية مكسرات بسيطة فايضة عندك برضو تتقشر وفي برطمان وعلي باب التلاجة عدل بدل ماهو مليييييييييييييييان علب ادوية بايظة عاوزة تتفرز وتترمى لو تاريخها خلص طبعا
وبنحاول نستغل المكسرات بسرعة في اى حلويات ويا حبذا لو كحك العيد مثلا او مع ارز بالخلطة لو عندك عزومة حلوة في العيد مثلا
كمان جوز الهند والزبيب دول طول السنة معايا بس مبسبهمش في الكيس بتاعهم عشان ممكن يطلهم مية من التلاجة او من اى شئ جنبهم ولازم جوز الهند يبقي في التلاجة والا ممكن يدود فكل ده في علب او برطمانات
كمان الفواكه المجففه او الياميش انا بفصص التمر وفي علبة كذلك باقي الفواكه في علب ولو فضل منهم حاجة باستغلها في حلويات

علي فكرة فوايد الياميش كبيره جدا وخدى الوصفة دى لو هتحطى زبيب مثلا في كيك عفريه دقيق الاول قبل ماتحطيه في العجينة عشان ما يسقطش تحت
كمان ممكن التين تحطيه مع شوية لبن دافي في طبق وسكر وسيبيه شوية بيبقي تحفة وممكن البلح
الحلويات
لو عندنا مخبوزات او بسكوتات او معجنات لازم نعرف ان فيه حاجات ممكن متقعدش معايا كتير زى المعجنات والبيتزات والكيكات فدى تتحط في التلاجة علطول في علب شيكولاتة اللي هى الصفيح زى كوفرتينا مثلا
وفيه بسكوت او بيتى فور ممكن يطول معانا شوية ويتحفظ بره بس بلاش علب بلاستيك عشان الرطوبة اما زجاج اوعلب صاج اوصفيح

شفتو النملة دى منستش نصيبها من بسكوت العيد

كذلك الجلاش او الكنافة او اى حاجة طرية زى القرص كمان في التلاجة
واى حاجة بلبن زى ارز بلبن ومكرونة بلبن وكمان متقعدش اكتر من تلات ايام
وحاجة كده صغيرة افتكرتها زمااااااااااااان كان فيه علب ملبس وشيكولاتة اسمها كورونا قد صفيحة الجبنة كده ولونها احمر وكانت مليانة اشكال والوان وكنا بنحفظ فيها الحلويات بتاعت العيد وكمان السكر وكان فيه علب اصغر زى علب كوفرتينا دلوقت او العلبة اللي فوق دى وعليها رسومات حلوة حد فاكر؟
بس عيبها انها لو طالها مية ومتنشفتش بتصدى ودلوقت عندنا علب اللبن المجفف زي النيدو وعلب عصير التانج ممكن نحفظ فيها وفيه ناس بتحفظ في علب سمن كل واحد وامكانياته
وممكن في حلل او كاسرونات صاج بس نبعد عن الرطوبة
يارب مكنش نسيت حاجة من اللي عاوزة اقلها ولو انى طولت عليكم ويارب اكون افدتكم باى شئ بحبكم في الله واستنونى تانى ان شاء الله بس عاوزة اعرف لو عجبكم الموضوع قيموه وقولوا رايكم ويارييييييييييت يبقي فيه تفاعل بيننا وكل واحدة تقول تجاربها وافكارها ونفيد بعض سلام ياكريستالات يافتوكات
ملحوظة
ارتفاع درجة الحرارة بيبوظ البقول والحبوب بسرعة زى البلاد الحارة مثلا السعودية الكويت او عندنا في الصيف الشديد فلازم نحفظها في التلاجة او نحطلها ملح او منجبش كميات كتير