المجلة
ازيكم يا احلى فتوكات النهاردة هاقدملكم الجزء التانى من سلسلة اوفر واضمن واحسن ليكى ولولادك فى البيت
وده لينك الجزء الاول اللى عملت فيه اللانشون عشان اللى مشفهوش
اوفر واضمن فى البيت لولادك عشان المدرسة (اللانشون البيتى )
https://da3m.forumarabia.com/f33-montadathread3435755
النهاردة بقى هاوريكم انا باعمل الحلاوة الطحينية ازاى فى البيت اوفر واسهل ما يكون ومضمونة وكفاية انها من صنع ايديكى
تنفع فى الفطار والعشا وكمان سندوتشات الولاد شوفى الحلاوة بره بكام وفى البيت هاتوفرى ازاى طالما مكونتها موجودة تعمليها فى اى وقت اسيبكم مع الصور والشرح
المقادير لبن بودرة اى نوع
وسكر بودرة
وطحينة
كميات متساوية من اللبن والسكر والطحينة حسب العجن
مكسرات ان وجدت او زبيب (اختيارى)
ويا سلام لو انتى موفرة وعاملة الطحينة فى البيت تبقى فتوكة بجد وكمان السكر تطحنيه فى الكبة او المطحنة لو مش عندك جاهز
انا هنا عملت حوالى نص كوب سكر على نص كوب لبن بودرة وتقريبا عليهم نص كوب طحينة
وهنا سمينا بالله وخلطنا السكر واللبن سوا وتبدى تزودى الطحينة شوية شوية وتقلبى كويس لحد ما توصل للقوام المطلوب متخليهاش طرية قوى لاء تكون متماسكة وحلوة اهى
شايفين متماسكة ازاى ولو هاتحطى المكسرات تحطيها معاها على الوش وفى قلب التقليب
وبعدين تعبيها فى اى علبة حلاوة عندك وتحفظيها فى التلاجة للاستعمال
روعة وطعمها نفس طعم الحلاوة الجاهزة بس الفرق انك عملاها بأيدك وفى بيتك
طب لو حابة تعمليها بالشيكولاتة زى اللى بتتباع هاتزودى فى الاخر معلقة صغيرة كاكاو وبتبقى تحفة
وهنا بقى انا عملتها بشكل جديد للولاد عشان يفرحوا بيها الصبح فى الفطار
جبت مكعبات التلج بشكل نجوم او مربعات الموجود وحطيت فى كل مكعب واحدة زبيب او سودانى كدة
ومليت المكعبات حلاوة وضغطت عليها كدة 
وكمان هنا بالشيكولاتة مكعبين اهو
وبعدين وسعتها شوية بالسكينة وقلبتها وشكلها اهى 
هايفرحوا بيها قوى وياكلوها قبل المدرسة تديهم طاقة وكلنا عارفين فوايد الحلاوة اد ايه
او تقدميها عادى على الفطار والله روعة
اتمنى تجربوها وهاتعجبكم جدا جدا جدا ومفيس اوفر ولا اسهل من كدة
وانتظرونى مع اوفر واسهل واضمن ليكى ولولادك فى البيت
