المجلة
النهارده هدف كل المصريين انه يوصل الرساله دي للريس مرسي..
"خلاص يا ريس زمن الضرب بالجزم انتهى"
سبب الرساله دي رساله تانيه بعتتها جماعة الاخوان للثوار في يوم جمعة الشريعه والشرعيه
والمليونيه اللي بيقولولنا فيها بالفم المليان اننا لو محترمناش نفسنا ووافقنا ع اللي الريس يقوله أدينا شفنا عددهم أد ايه فنسكت احسن ما ناخد بالجزمه .. وفـ نفس اليوم خرج علينا الريس بإنه مش هيتراجع عن قراراته واي حد هيعترض هيبقى فلول والفلول ليهم مواد كتير رادعه في الدستور الجديد ...!!!
يعني ايه الكلام ده ..!!..؟
يا إما نبقى اخوان ونوافق على قرارات الجماعه حسب منطق لا تناقش ولا تجادل ..يا إما نبقى فلول..!!..؟
سبحان مغير الاحوال .. دلوقتي احنا اللي بقينا فلول..!!!!!!!!!!!!!
لا يا ريس .. مش هنكون اخوان ومتسألنيش ليه لأن الشعب كله عرف خلاص انكم لا تملكوا فكر سياسي او حتى دعوي .. وكمان محناش فلول واسأل صحابنا الشهداء "الورد اللي فتح في جناين مصر"
وهاتلي اسم اخوانجي واحد مات في الثوره .. وافتكروا انتوا اتشعبطوا فيها ازاي على كتافنا وحس هتافتنا ..
بس وانتا بتفتكر اسمحلي اسألك .. هو كنت انتخبتك في الاول عشان اعمل ثوره ضدك دلوقتي ..؟
طب ايه اللي يخليني أثور على حكمك لو انا واخد حقي وشايف ان قراراتك هتفيدني وهتحررني مش بتقيدني اكتر من الاول ..؟ يعني ايه تصادر حقي في اني اعترض واقولك لأ ..؟ يعني ايه الشعب يرفض اللي انتا عايزه وبرضو تفضل مصمم عليه ..؟ وافسرها ازاي انك تجمع اخوانك في اتوبيسات عامه على حساب الجماعه من جميع محافظات مصر وكمان التاكسيات الخاصه اللي كانت بتقف قدام الناس في الشارع وتوزع عليهم ورق والسواق يعرض عليهم يوصلهم لميدان النهضه عشان اللي في التحرير دول فلول وكفره ..؟ بالزمه ينفع كده ..؟
(( انا مش عاوز واحد يحكمني بفكر جماعه تفكيرها ديكتاتوري رجعي متشدد .. انا محتاج حد يحررني .. وطالما بطالب بالحريه يبقى اكيد فاهم انها مسئوليه .. يعني عارف اللي عليا .. فين بقى اللي ليا .. فين الحريه ..؟ ))
النهارده الثلاثاء 4/12/2012م
لما عملتوا ثورتكم اللي سميتوها جمعة الشريعه والشرعيه كنا موجودين في ميدان التحرير بس مكناش كتير .. عارف ليه ..؟كنا عايزين نعرف هتعملوا ايه ..؟ آخركم ايه ..؟ وأدينا عرفنا بس ما خوفناش والحمد لله عشان انذار الجماعه كان انذار كاذب .. النهارده بقى هنطلعلكوا الانذار اللي بجد .. بس خلي بالك انتا والجماعه ان ده هيبقى ...
الانذار الاخير للجماعه
لما خرجنا في 25 يناير نصبنا 95 خيمه عامه غير الخيم الخاصه وغير الناس اللي كانت بتفرش بطاطين وتنام ع الارض قدام عينيك لو كنت فاكر ..... النهارده بقى .. عاملينلك مفاجأه .. اتمنى تلحق تشوفها ..
.... بقى بالزمه في كده ..؟ في ريس يحصن قراراته ضد اعتراض الشعب بإعلان دستوري ..؟
عارف ده معناه ايه ..؟ معناه انك عارف ان الشعب هيرفض ..
طب مين اصلا ممكن يوافق على جمعيه اعضاءها مش متخصصين في الدستور ..؟
طب هاتلي حد مش اخواني موافق على الدستور اللي اتعادت صياغة مسودته 9 مرات قبل كده وعشان العاشره متبقاش في نفس المصير اصدرت اعلانك الديكتاتوري"الدستوري آسف" ..؟
طب مش كفايه الناس اللي انسحبوا من التأسيسيه اللي كانوا بيمثلوا كل طوائف وحركات واحزاب وائتلافات الشعب ..؟ مش كفايه انه مبقاش فاضل فيها غير الاخوان ..؟ طب فاضل ايه كمان ..؟
طب ينفع يبقى في قضيه مرفوعه في المحاكم ضد صحة تشكيل الجمعيه التأسيسيه وتطلع بقرار ان الجمعيه تستمر في عملها بوضع الدستور والمصيبه انه يحصل فعلا وميكملش اسبوع ونلاقي مشروع دستور بيتم التصويت عليه ع الهوا ورئيس الجمعيه يسأل الاعضاء في حد معترض ونتفاجئ بالموافقه من الاخوان كلهم في تمثليه سخيفه مصتنعه ..؟ لأ والمصيبه الاكبر انه يوم النطق بالحكم نتفاجئ بمجموعه من الاخوان بيمنعوا القضاه من دخول قاعة المحكمه ..!!!
طب انا راضي زمتك .. مين البلطجيه .. اللي كانوا بينادوا بالسلميه وسط النار ودم الشهداء .. ولا الاخوانجيه ..؟
ويا إما نوافق ع الدستور بتاع التأسيسيه .. او نوافق ع الاعلان الدستوري ..!!
هي دي الحريه ..؟ طب يبقى شكلها ايه الديكتاتوريه ..؟
( احنا عايزين دستور عادل ينفع لكل المصريين )
ولا القضاه كمان دي حكايتهم حكايه ..
ازاي عايز تبقى انتا المسئول عن تعينهم ..؟ هو ده من حقك ..؟
لو كان من حقك يبقى اكيد لازم يسمعوا كلامك عشان متفصلهمش .. مهو هيبقى من حقك ترفدهم ساعتها ..
يبقى فين العدل ...؟
يا ريس احنا قضاءنا مستقل وملوش دخل بالسياسه نهائيا .. بس انتا دخلته في اللعبه ..
لا وبتطلب منه الاشراف على عملية الاستفتاء ع الدستور الجديد ..!!!!!!!!!!!
كنت فاكر انهم هيرفضوا عشان تجيب الناس اللي قلت عليهم دول ..؟
طب أديهم وافقوا ... برغم انهم معتصمين ومعلقين العمل بالمحاكم لحين الغاء الاعلان الدستوري ..
بس عارف هما وافقوا ليه ..؟ عشان هما الضمانه الوحيده للمصريين ان الانتخابات تطلع نزيهه ..وبرضو هيفضلوا معتصمين ودي اول مره تحصل في تاريخ مصر ..
واحنا كمان كلنا النهارده هنعلن الاعتصام وهنعمل اضراب شامل وعام في الدوله بحالها
وخليك فاكر اني قولتلك ان ده الانذار الاخير للجماعه .
مجرد انسان ــــــ بقلمي ــــــ just human
